Monday, February 13, 2012

ដួងចិត្តសម្ងាត់

ដួងចិត្តសំងាត់

2012-02-07

ដោយ មៀច នាង សហរដ្ឋអាមេរិក

(បទកាកគតិ)

១. ពេលខ្ញុំឃើញស្រី វង់ភក្ត្រប្រិមប្រិយ ដូចដួងព្រះចន្ទ្រ

ស្រីខ្មែរបវរ ចិត្តខ្ញុំជាប់មន្ត ស្នេហ៍ស្រីតូចតន់
ដកចិត្តពុំបាន។

២. មិនហ៊ានវាចា ទៅកាន់ជីវា ថារៀមស្ម័គ្រប្រាណ

រួមរស់នឹងស្ងួន លុះដល់អវសាន ទោះរៀមក្ស័យប្រាណ
ក៏មិនរុញរា។

៣. ហាស្ដីមិនរួច បានត្រឹមតែលួច មើលស្ងួនពុំងា

តើកម្មអ្វីខ្ញុំ ដូចមានវេរា ពេលជួបពុំងា
បាត់អស់ស្មារតី។

៤. កែវភ្នែកមុតថ្លា សម្លឹងកាលណា រាមញ័រហរទ័យ

ទ្រូងញ័រស្ទើរធ្លាយ ធ្លាយធ្លាក់ដល់ដី ស្រីមានមន្តអ្វី
ម្ចាស់ស្រីសំឡាញ់?

៥. ទប់ចិត្តមិនបាន ញ័រអស់អង្គប្រាណ អង្គប្រាណបានចាញ់

សម្រស់ស្រីល្អ ថ្លែងសបង់បាញ់ បងជាប់សំណាញ់
ស្នេហ៍ស្រីល្អឯក។

៦. ឱអង្គខ្ញុំអើយ តើពេលណាឡើយ ទើបកម្មឈប់ជ្រែក

ឲ្យចេញវាចា រកស្រីល្អឯក ថាខ្ញុំពន់រែក
ស្នេហ៍ស្រីម្នាក់ឯង។

៧. នាងមិនដឹងខ្លួន ខ្ញុំទុក្ខរឹតផ្ទួន ស្ទើរឆ្កួតវង្វេង

សញ្ជឹងក្នុងចិត្ត ថាឱស្រីក្មេង តើជាគូព្រេង
ឬក៏យ៉ាងណា?

៨. បែរបន់បួងសួង លើកហត្ថសំរួម ឥន្ទ្រព្រហ្មទេវតា

ពន្យល់ចិត្តស្រី ថាខ្ញុំស្នេហា តែកែវកនិដ្ឋា
ស្នេហាបងអើយ។

៩. ហាក់គ្មានបានអ្វី ព្រោះតែស្រស់ស្រី នៅធ្វើព្រងើយ

ស្ងួនមិនបានដឹង ព្រលឹងបងអើយ ទុក្ខបងគ្មានស្បើយ
ល្ហែល្ហើយថ្ងៃណា។

១០. លួចស្នេហ៍លាក់ទុក គរក្នុងជង្រុក ជង្រុកស្នេហា

ពាក្យស្នេហ៍មួយម៉ាត់ មិនហ៊ានវាចា ទៅរកជីវា
ឲ្យស្រីបានយល់។

១១. បានត្រឹមសម្លឹង រួចគិតសញ្ជឹង ឲ្យទ្រូងខ្វាយខ្វល់

តើពេលណាទៅ ទើបពៅនិមល បានដឹងនឹងយល់
យល់ចិត្តរាមរ៉ា។

១២. ខែមួយផុតទៅ ឆ្លងដល់រដូវ ប្រាំងចូលវស្សា

ផុតទៅដល់ឆ្នាំ ទ្រូងកម្មខ្លោចផ្សា លាក់ចិត្តវាចា
ដួងចិត្តសំងាត់។

១៣. ចូលដល់ឆ្នាំបី សម្រេចចិត្តថ្មី ថាចិត្តត្រូវកាត់

និយាយនឹងស្រី ពីស្នេហ៍សំងាត់ ទោះបីស្រីបាត់
ស្រីបានទៅគេ។

១៤. ពេលនេះបានយល់ ដឹងថានិមល ព្រមដាក់ទានស្នេហ៍

ខ្ញុំបានស្បើយចិត្ត រឹតពីបុព្វេ លកលៃរិះរេ
និយាយនឹងម្ដាយ។

១៥. ម៉ែពោលពាក្យថា ប្រុសស្ងួនពុំងា បុត្រថ្លៃឆោមឆាយ

កូនគេមន្ត្រី ឋានៈហួសឆ្ងាយ តើអ្នកឲ្យម្ដាយ
ធ្វើអ្វីនឹងបាន?

១៦. គេមានស័ក្ដិយស ត្រកូលគេខ្ពស់ ណាប្រុសកល្យាណ

ឯគ្រួសារយើង ទ្រព្យធនក៏គ្មាន ធ្វើម្ដេចម្ដាយហ៊ាន
តភ្ជាប់និស្ស័យ?

១៧. ខ្ញុំមានចំណេះ សូមម៉ែត្រិះរិះ គិតសាជាថ្មី

ក្រែងប៉ានាងព្រម ទុកដាក់កូនស្រី ក្រែងភ័ព្វនិស្ស័យ
ឱណាម៉ែណា!

១៨. ទ្រូងខ្ញុំប្រេះធ្លាយ ដោយដឹងឆោមឆាយ រង់ថ្ងៃរៀបការ

នឹងគេមន្ត្រី ក្នុងទូតរាជការ សែនស្ដាយជីវា
ស្ដាយពេញមួយជាតិ។

១៩. រឿងខ្ញុំរឿងពិត ញាតិអើយជួយគិត ខ្ញុំធ្វើអ្វីទៀត

ចិត្តស្នេហ៍ស្ងួនមួយ ស្នេហ៍ពេញមួយជាតិ ឥឡូវត្រូវឃ្លាត
ឃ្លាតមួយជីវិត។

២០. សាងជីវិតថ្មី រត់ចោលទឹកដី ព្រោះស្នេហ៍ស្រីពិត

ទោះនៅឯនាយ ក៏បងនៅគិត សាកសួរញាតិមិត្ត
ពីស្រីជីវា។

២១. តើស្ងួនបានសុខ ឬស្ងួនមានទុក្ខ រាល់ទិនទិវា

ចិត្តបងពុំស្ងប់ គិតស្ងួនគ្រប់គ្រា បើស្ងួនសុខជា
បងសប្បាយក្រៃ។

២២. ឮថាស្ងួនសុខ រៀមបានស្បើយទុក្ខ ស្បើយដួងហឫទ័យ

ធូរចិត្តកង្វល់ ខ្វាយខ្វល់រាល់ថ្ងៃ ស្រីអើយៗស្រី
សុខរហូតណា!

២៣. ជាតិនេះនិស្ស័យ ត្រឹមលួចស្នេហ៍ស្រី ទុកក្នុងឱរា

បានត្រឹមមើលអូន មើលស្ងួនពុំងា មើលថ្លៃជីវា
រៀបការនឹងគេ។

២៤. តែ!ណ្ហើយចុះ បងខំប្រឹងរស់ រស់មើលស្រីស្នេហ៍

ខំប្រឹងធ្វើការ រៀងរាល់ថ្ងៃខែ ឲ្យទ្រូងបានល្ហែ
ពីស្នេហ៍ស្រីពៅ៕

ជីវិតស្រីឡង់សេ

2012-02-04

ដោយ យុន សុគុណ្ណា

១.ជីវិតស្រីបាពេលរាត្រី កំដរលោកិយប្រុសតណ្ហា
ខ្ញុំមិនចង់ធ្វើទេញាតិណា ធ្វើម្ដេចវាសនាបានចារមក។

២.មានខ្លះដៀលថាខ្ញុំក្ខិណី ជាស្រីអបលក្ខណ៍រស់ពឹងជ្រក
លក់តែសម្រស់មិនប្រឹងរក ខ្ញុំសែនវិប្បយោគក្នុងដួងចិត្ត។

៣.តើមានន័យអ្វីរស់ក្នុងលោក មានរូបទុក្ខសោកផ្ទួនៗពិត
តើនេះហើយឬព្រហ្មលិខិត កំណត់ជីវិតស្រីដូចខ្ញុំ។

៤.ភ្លើងពណ៌ភ្លឺផ្លេកជ្រែករាត្រី សំឡេងតន្ត្រីលាន់រងំ
តើអ្នកដឹងទេចិត្តខ្ញុំយំ រងទុក្ខក្រៀមក្រំព្រោះក្រពះ។

៥.ក្រពះចុកពើតព្រោះអាហារ គ្រួសារជាការសំខាន់ណាស់
ម្យ៉ាងទៀតប្អូនៗនៅពេញផ្ទះ ខ្ញុំត្រូវជម្នះខំរកប្រាក់។

៦.រៀនក៏បានតិចមិនចេះអ្វី ការងារធំថីចេះស្ទើរស្ទាក់
ឡង់សេនេះហើយអាចរកប្រាក់ ចិញ្ចឹមក្រពះប្អូនជីវ៉ា។

៧.ញាតិអើយសូមអ្នកកុំសើចយំ បើអ្នកជាខ្ញុំគិតយ៉ាងណា
កិត្តិយសសំខាន់ ឬគ្រួសារ បើក្រពះផ្សារស្ទើរក្សិណក្ស័យ។

៨.ចង់តែរត់គេចចាកទ្វីបលោក មានតែទុក្ខសោកតាមប្រល័យ
ប៉ុន្តែអាណិតប្អូនៗថ្លៃ អាយុក្មេងខ្ចីមិនដឹងការ។

៩.រស់នៅតាមតែព្រហ្មលិខិត កំណត់ជីវិតចិត្តស្រីបា
អភ័ព្វខុសគេក្នុងលោកា តើមានស្រីណាដូចជាខ្ញុំ។

១០.ពេលខ្លះគេរំលោភបំពាន ឲ្យខ្ញុំក្រំក្រៀមថ្នាក់ស្រែកយំ
ឱជីវិតអើយរងទារុណ តើនៅជាតិមុនខ្ញុំសាងអ្វី?

១១.បានតែជាតិនេះជួបតែកម្ម គ្មានបានស្រាកស្រាន្តកាយល្ហិតល្ហៃ
តើឯណាទៅត្រង់អត្ថន័យ ខ្លឹមសារតម្លៃនៃជីវិត?

១២.ជំងឺព្យាធិតាមបៀតបៀន រុករានរូបកាយក្លាយរួមរឹត
កំព្រឹងកំព្រាវេទនាចិត្ត សំណោកជីវិតចិត្តខ្លោចផ្សា។

១៣.សូមអ្នកប្រហារកាយខ្ញុំទៅ មិនចង់រស់នៅក្នុងលោកា
លោកនេះពោរពេញដោយទុក្ខា លំបាកហួសថាម្ល៉េះព្រះអើយ។

១៤.នេះហើយជីវិតស្រីរាំបារ គ្មានបានសុខាម្តងណាឡើយ
ធ្វើម្ដេចជាតិនេះហួសទៅហើយ បើមានជាតិក្រោយកុំឲ្យយល់។

១៥. កុំឲ្យមានរឿងដូចនេះឡើយ សូមខ្ញុំបានល្ហើយកុំឲ្យខ្វល់
ប្រសិនបើមានកើតអំពល់ ឱព្រះពាយខ្យល់បក់ឲ្យឆ្ងាយ។

១៦.ខ្ញុំសូមរៀបរាប់ប៉ុណ្ណឹងចុះ បើសិនមានខុសសូមបរិយាយ
ជួយកែតម្រូវផងមិត្តអើយ សូមលាសិនហើយមួយគ្រាសិន៕

ម្ចាស់ស្លាប់មុនប៉ុន្តែបទចម្រៀងរស់

2012-02-03

ដោយ វ៉ា ប៊ុណ្ណនី

(បទកាកគតិធម្មតា)

១. បែបបទចម្រៀង លន្លោចសូរ្យសៀង រណ្ដំពីរោះ

កំណាព្យកាព្យឃ្លោង លំដាប់កិត្តិយស សំដៅឈានឆ្ពោះ
បន្ថយស្ត្រែះរោគ។

២. សាមុតសុទ្ធា កម្មកាចវេរា បានលាចាកលោក

ខ្មេះខ្មោចអាវខ្មៅ អស់ខ្មែរគគោក ក្ដោបក្ដាប់ជ័យជោគ
ទោសទុក្ខសាសន៍ឯង។

៣.ប៉ែន រ៉ន សុស ម៉ាត់ អ៊ិន យ៉េងបង់បាត់ ណារីស្ញប់ស្ញែង

ហុកសេងល្បីល្បាញ ពេលច្រៀងសម្ដែង សំឡេងអង្វែង
ខ្មែរស្គាល់ស្នាដៃ។

៤. ម្ចាស់ស្លាប់ចោលបទ ប្រជាប្រាកដ ពីរោះសម័យ

ជាង៥០ឆ្នាំ សោភ័ណថ្លាថ្លៃ អាឡោះអាល័យ
ក្រអៅក្រអួន។

៥.បទស្លាប់ចោលម្ចាស់ ណាយប្រាកដណាស់ ត្បិតមិនមាំមួន

មួយឆាវមួយខែ យុវអង្រួន ទិញ២ ៣ ៤
រលប់រលាប។

៦. រត់តាមអ្នកស្ដាប់ ន័យមិនចំណាប់ ព្រឺសំឡេងព្រាប

ថ្ងូរផងរាប់ផង ចុងជួនជ្រុះជ្រាប ដំណើររោលរាប
មិនលង់អារម្មណ៍។

៧. កើតភ្លែតស្លាប់ភ្លាម មិននៅទីមទាម ចាប់ឆ្នោតច្រឡំ

ចាក់ផ្សាយចេញលក់ ហ៊ឺហាហាក់ហំ ស្អុះស្អាប់តែស្អំ
មនុស្សទាន់សម័យ។

៨. ម្ចាស់ស្លាប់បទរស់ មិនឈ្មុលមានឈ្មោះ តម្លាតម្លៃ

អាយុយូរឆ្នាំ ទឹកដមទឹកដៃ កេរកាលកែច្នៃ
លន្លង់ជាប់ចិត្ត។

៩. ម្ចាស់រស់បទស្លាប់ ដូចឃើញមានស្រាប់ គ្មានអ្វីផ្ដេកផ្ដិត

ប្រៀបដូចជាផ្សែង ក្លិនមិនឈ្ងុយឆ្ងិត អត្ថន័យកម្រិត
រស់មិនយូរឡើយ៕

+រស់អាយវែងត្រូវមានន័យ ស្លាប់អាយុខ្លីត្រូវសំខាន់

រស់អាយុវែងឲ្យមានន័យ ស្លាប់អាយុខ្លីត្រូវសំខាន់

2012-01-31

និពន្ធដោយ ផេង សូភ័ណ សហរដ្ឋអាមេរិក

១. ខ្លាតោពេលស្លាប់គេយកស្បែក តុបតែងមួយផ្នែកប៉ែករចនា
តាំងតែងលំអក្នុងទិវា សម្រាប់ប្រជាមើលកម្សាន្ត។

២. ដំរីយកភ្លុកទុកតាំងតែង លំអផ្សេងៗពេលមានការ
មានតូចមានធំក្នុងពន្លា ដល់អ្នកគ្រប់គ្នាឲ្យបានយល់។

៣. ដំរីតោខ្លានាមជាសត្វ ស្លាប់ហើយមិនបាត់សល់សំណៅ
ទោះបីខ្លួនស្លាប់លាលោកទៅ សំណាកសល់នៅជាសំគាល់។

៤. ដើមឈើយកខ្លឹមមកចាត់ចែង គ្រឿងសំអាងតែងក្បាច់រចនា
ជារូបចម្លាក់ទូថូផ្កា តុគ្រែនានាតាមតម្រូវ។

៥. ទោះជាកាប់ចាំងបែងជាកង់ ឆ្លាក់ឆ្វៀលកោងត្រង់ថែមដុសខាត់
គង់សល់ដើមដានមិនសូន្យបាត់ ឈើខ្លឹមល្អពិតដល់អ្នកប្រើ។

៦. បក្សីមានស្លាបអាចហោះហើរ ចំណែកដើមឈើមានសំបក
មនុស្សមានឆន្ទៈពេលកើតមក ខិតខំរិះរកគ្រប់កិច្ចការ។

៧. ចុះបើអង្គអញធាតុជាមនុស្ស យល់ដឹងត្រូវខុសនោះយ៉ាងណា
មានអ្វីបន្សល់ផ្ដល់លោកា ដូចដំរីខ្លាតោដើមឈើ។

៨. រស់អាយុវែងឲ្យមានន័យ ស្លាប់អាយុខ្លីត្រូវសំខាន់
កុំស្លាប់ដូចពស់គ្រោះឡានជាន់ អាយុវែងគ្រាន់ដូចកង្កែប៕

Sunday, February 12, 2012

កំណាព្យថ្ងៃ១៤ កុម្ភៈ

១៤ កុម្ភៈ ១៤ ស្ដាយ

2012-02-10

និពន្ធដោយ ស៊ុន ទ្រី និស្សិតបរិញ្ញាបត្រជាន់ខ្ពស់ភាសាសាស្ត្រសាកលវិទ្យាល័យ ភូមិន្ទភ្នំពេញ។

១៤ កុម្ភៈជាក់បុណ្យថ្មី                         ១៤ សប្បាយគ្រប់ៗគ្នា

១៤ សប្បាយគ្រប់ៗគ្នា                        ១៤ ទិវាក្ដីស្រលាញ់។

១៤ សប្បាយលាយភ័យភិត                ១៤ ជីវិតសែនក្នក់ក្នាញ់

១៤ អស្ចារ្យជាងសាមញ្ញ                    ១៤ ស្រលាញ់មានរស្មី។

១៤ បើកចិត្តសិទ្ធិស្នេហា                    ១៤ ជូនផ្កាដោយភក្ដី

១៤ ផ្ការីកតាមវិថី                               ១៤ ប្រុសស្រីថ្លែងពីចិត្ត។

១៤ បុណ្យថ្មីចូលកម្ពុជា                      ១៤ គ្រប់គ្នាថ្លាជីវិត

១៤ លយឆាយស្ទើរលែងគិត   ១៤ បើកចិត្តប្រាប់លោកា។

១៤ ស្រីៗរំពៃចាំជង់                            ១៤ ឱនអង្គជ្រកអាត្មា

១៤ សប្បាយភ្លេចកាយា                      ១៤ មន្តផ្កាប្រហារបរិសុទ្ធ។

១៤ មានល្បិចលាក់កំណួច                 ១៤ កំហូចគួរតក់ស្លុត

១៤ ប្រុសព្រានរង់ដុត                        ១៤ បរិសុទ្ធនាងនារី។

១៤ ផ្អែមណាស់ផ្កាមួយទង                 ១៤ រំលងប្រពៃណី

១៤ ប្រុសខ្លះចាំតែស៊ី                           ១៤ យំហ៊ីសែនសោកស្ដាយ។

១៤ ខែពីរគេស៊ីស៊ីន                           ១៤ ដូចមីនកម្ទេចកាយ

១៤ ឃោរឃៅលែងនិយាយ             ១៤ ទំនាយទាយអាស្រូវ។

១៤ ផុតហួសជួសមិនបាន                   ១៤ សុខសាន្តផុតបាត់ទៅ

១៤ បានអ្វីជួសកាយពៅ                     ១៤ ទុក្ខនៅក្ដីខ្វល់ខ្វាយ។

១៤ គួរគិតពិចារណា                           ១៤ នេះណាបុណ្យពីឆ្ងាយ

១៤ ស្រុកគេមិនចំណាយ                   ១៤ ចិត្តកាយដូចយើងទេ។

១៤ ស្រុកគេគឺស្រលាញ់                    ១៤ មិនចាញ់គូទាំងទ្វេ

១៤ ស្រលាញ់មិនរើសទេ                  ១៤គេស្នេហ៍គ្រប់ក្មេងចាស់។

១៤ ស្រីអើយគួរចាំទុក                       ១៤ ទំនុកដល់ចំណាស់

១៤ ថែកាយកុំផ្ដេសផ្ដាស                    ១៤ គួរខ្មាសខ្លួនជាស្រី។

១៤ ថែព្រហ្មចារីខ្លួន                             ១៤ គួរស្ងួនខ្លួនអោយថ្លៃ

១៤ លូនក្រាបលោកដោយដៃ             ១៤ អោយថ្លៃដល់មេបា។

១៤ គួរគិតយើងជាខ្មែរ                      ១៤ គួរថែជាតិខេមរា

១៤ គោរពដល់ដូនតា                        ១៤ រៀបការសុំបូជា។

១៤ សុំទោស ១៤ ជូនពរ

១៤ ចុងក្រោយសុំអភ័យ          ១៤ សំដីលើសយ៉ាងណា

១៤ វន្ទាទាំងកាយា                                ១៤ ករុណាខ្ញុំបាទផង។

១៤ សុំសុខដល់គ្រប់គ្នា                       ១៤ សុំជាសុខបំណង

១៤ ពណ្ណរាយដល់ប្អូនបង                  ១៤ សុខផងតទៅអើយ៕

Saturday, February 11, 2012

The Greening-of-Whitney-Brown

ទាញយកត្រង់នេះ បន្ទាប់មកសូមចុចសញ្ញាខ្វែងដើម្បីមើល ឬដោនឡូតបាន!

All Khmer Unicode Fonts

ប្រសិនបើលោកអ្នកមិនមានAll Khmer Unicode Fontsសូមចុចត្រង់នេះ ដើម្បីតម្តើង និងអានបាន!

Flash Clock

LikeBox

ទាញយកយូនីកូដខ្មែរៈ

ចំណាត់ថ្នាក់តាមក្រុម

movies

កំណាព្យ

Followers

ម៉ោងនៅកម្ពុជា

Weather

Blogger news

Clock Style

Monday, February 13, 2012

ដួងចិត្ត​សំងាត់

2012-02-07

ជីវិត​ស្រី​ឡង់សេ

2012-02-04

ម្ចាស់​ស្លាប់​មុន​ប៉ុន្តែ​បទ​ចម្រៀង​រស់

2012-02-03

Sunday, February 12, 2012

Saturday, February 11, 2012

Ramayana - The Epic

Social Profiles

អត្ថបទពេញនិយមបំផុត

Music Player

អត្រាប្តូរប្រាក់នៅកម្ពុជា

ប្រតិទិន

Labels

Blog Archive

Live Traffic Feeds

Total Vistors

Website IT

Content left

គេហទំព័រកំសាន្ត

គេហទំព័រព្រះធម៌ និងសុខភាព

News​ and Job Website

ដួងចិត្តសំងាត់

ជីវិតស្រីឡង់សេ

ម្ចាស់ស្លាប់មុនប៉ុន្តែបទចម្រៀងរស់

News and Job Website