បទសរភញ្ញ

បទសរភញ្ញ

១.សូមថ្វាយបង្គំព្រះសម្ពុទ្ធ                    ប្រសើរបំផុតក្នុងលោកា

ជាគ្រូនៃមនុស្សនិងទេវតា                     ទ្រង់ត្រាស់ទេសនាប្រដៅសត្វ។

ចង្អុលឱ្យដើរផ្លូវកណ្តាល                       មាគ៌ាត្រកាលអាចកំចាត់

ទុក្ខភ័យចង្រៃឱ្យខ្ចាយខ្ចាត់                    អាចកាត់សង្សារទុក្ខបាន។

២.សាសនាព្រះអង្គនៅសព្វថ្ងៃ             សត្វមាននិស្ស័យពីបូរាណ

ប្រឹងរៀនប្រឹងស្តាប់ចេះចាំបាន              កាន់តាមលំអានបានក្តីសុខ។

ឥតមានសុខណាស្មើក្តីស្ងប់                  បញ្ចប់ត្រឹមសុខឃ្លាតចាកទុក្ខ

តាំងពីលោកនេះតទៅមុខ                    ក្តីសុខនឹងមានព្រោះធម៌ស្ងប់។

៣.ខ្ញុំសូមបង្គំឆ្ពោះព្រះធម៌                     ព្រះសង្ឃបរវរទាំងគ្រប់សព្វ

រួមជាត្រៃរតន៍គូរគោរព                          ជាម្លប់ត្រជាក់នៃលោកា។

ព្រះរូបព្រះធាតុនៃព្រះពុទ្ធ                      វិសុទ្ធតាំងអង្គព្រះសាស្តា

សូមគុណត្រៃរតន៍ជួយខេមរា                ឱ្យបានសុខាតរៀងទៅ។

ព្រះរាជនិពន្ធដោយសម្តេចព្រះមហាសុមេធាធិបតី (ជួន ណាត)។