ដួងចិត្តសំងាត់
2012-02-07
ដោយ មៀច នាង សហរដ្ឋអាមេរិក
(បទកាកគតិ)
១. ពេលខ្ញុំឃើញស្រី វង់ភក្ត្រប្រិមប្រិយ ដូចដួងព្រះចន្ទ្រ
ស្រីខ្មែរបវរ ចិត្តខ្ញុំជាប់មន្ត ស្នេហ៍ស្រីតូចតន់
ដកចិត្តពុំបាន។
ដកចិត្តពុំបាន។
២. មិនហ៊ានវាចា ទៅកាន់ជីវា ថារៀមស្ម័គ្រប្រាណ
រួមរស់នឹងស្ងួន លុះដល់អវសាន ទោះរៀមក្ស័យប្រាណ
ក៏មិនរុញរា។
ក៏មិនរុញរា។
៣. ហាស្ដីមិនរួច បានត្រឹមតែលួច មើលស្ងួនពុំងា
តើកម្មអ្វីខ្ញុំ ដូចមានវេរា ពេលជួបពុំងា
បាត់អស់ស្មារតី។
បាត់អស់ស្មារតី។
៤. កែវភ្នែកមុតថ្លា សម្លឹងកាលណា រាមញ័រហរទ័យ
ទ្រូងញ័រស្ទើរធ្លាយ ធ្លាយធ្លាក់ដល់ដី ស្រីមានមន្តអ្វី
ម្ចាស់ស្រីសំឡាញ់?
ម្ចាស់ស្រីសំឡាញ់?
៥. ទប់ចិត្តមិនបាន ញ័រអស់អង្គប្រាណ អង្គប្រាណបានចាញ់
សម្រស់ស្រីល្អ ថ្លែងសបង់បាញ់ បងជាប់សំណាញ់
ស្នេហ៍ស្រីល្អឯក។
ស្នេហ៍ស្រីល្អឯក។
៦. ឱអង្គខ្ញុំអើយ តើពេលណាឡើយ ទើបកម្មឈប់ជ្រែក
ឲ្យចេញវាចា រកស្រីល្អឯក ថាខ្ញុំពន់រែក
ស្នេហ៍ស្រីម្នាក់ឯង។
ស្នេហ៍ស្រីម្នាក់ឯង។
៧. នាងមិនដឹងខ្លួន ខ្ញុំទុក្ខរឹតផ្ទួន ស្ទើរឆ្កួតវង្វេង
សញ្ជឹងក្នុងចិត្ត ថាឱស្រីក្មេង តើជាគូព្រេង
ឬក៏យ៉ាងណា?
ឬក៏យ៉ាងណា?
៨. បែរបន់បួងសួង លើកហត្ថសំរួម ឥន្ទ្រព្រហ្មទេវតា
ពន្យល់ចិត្តស្រី ថាខ្ញុំស្នេហា តែកែវកនិដ្ឋា
ស្នេហាបងអើយ។
ស្នេហាបងអើយ។
៩. ហាក់គ្មានបានអ្វី ព្រោះតែស្រស់ស្រី នៅធ្វើព្រងើយ
ស្ងួនមិនបានដឹង ព្រលឹងបងអើយ ទុក្ខបងគ្មានស្បើយ
ល្ហែល្ហើយថ្ងៃណា។
ល្ហែល្ហើយថ្ងៃណា។
១០. លួចស្នេហ៍លាក់ទុក គរក្នុងជង្រុក ជង្រុកស្នេហា
ពាក្យស្នេហ៍មួយម៉ាត់ មិនហ៊ានវាចា ទៅរកជីវា
ឲ្យស្រីបានយល់។
ឲ្យស្រីបានយល់។
១១. បានត្រឹមសម្លឹង រួចគិតសញ្ជឹង ឲ្យទ្រូងខ្វាយខ្វល់
តើពេលណាទៅ ទើបពៅនិមល បានដឹងនឹងយល់
យល់ចិត្តរាមរ៉ា។
យល់ចិត្តរាមរ៉ា។
១២. ខែមួយផុតទៅ ឆ្លងដល់រដូវ ប្រាំងចូលវស្សា
ផុតទៅដល់ឆ្នាំ ទ្រូងកម្មខ្លោចផ្សា លាក់ចិត្តវាចា
ដួងចិត្តសំងាត់។
ដួងចិត្តសំងាត់។
១៣. ចូលដល់ឆ្នាំបី សម្រេចចិត្តថ្មី ថាចិត្តត្រូវកាត់
និយាយនឹងស្រី ពីស្នេហ៍សំងាត់ ទោះបីស្រីបាត់
ស្រីបានទៅគេ។
ស្រីបានទៅគេ។
១៤. ពេលនេះបានយល់ ដឹងថានិមល ព្រមដាក់ទានស្នេហ៍
ខ្ញុំបានស្បើយចិត្ត រឹតពីបុព្វេ លកលៃរិះរេ
និយាយនឹងម្ដាយ។
និយាយនឹងម្ដាយ។
១៥. ម៉ែពោលពាក្យថា ប្រុសស្ងួនពុំងា បុត្រថ្លៃឆោមឆាយ
កូនគេមន្ត្រី ឋានៈហួសឆ្ងាយ តើអ្នកឲ្យម្ដាយ
ធ្វើអ្វីនឹងបាន?
ធ្វើអ្វីនឹងបាន?
១៦. គេមានស័ក្ដិយស ត្រកូលគេខ្ពស់ ណាប្រុសកល្យាណ
ឯគ្រួសារយើង ទ្រព្យធនក៏គ្មាន ធ្វើម្ដេចម្ដាយហ៊ាន
តភ្ជាប់និស្ស័យ?
តភ្ជាប់និស្ស័យ?
១៧. ខ្ញុំមានចំណេះ សូមម៉ែត្រិះរិះ គិតសាជាថ្មី
ក្រែងប៉ានាងព្រម ទុកដាក់កូនស្រី ក្រែងភ័ព្វនិស្ស័យ
ឱណាម៉ែណា!
ឱណាម៉ែណា!
១៨. ទ្រូងខ្ញុំប្រេះធ្លាយ ដោយដឹងឆោមឆាយ រង់ថ្ងៃរៀបការ
នឹងគេមន្ត្រី ក្នុងទូតរាជការ សែនស្ដាយជីវា
ស្ដាយពេញមួយជាតិ។
ស្ដាយពេញមួយជាតិ។
១៩. រឿងខ្ញុំរឿងពិត ញាតិអើយជួយគិត ខ្ញុំធ្វើអ្វីទៀត
ចិត្តស្នេហ៍ស្ងួនមួយ ស្នេហ៍ពេញមួយជាតិ ឥឡូវត្រូវឃ្លាត
ឃ្លាតមួយជីវិត។
ឃ្លាតមួយជីវិត។
២០. សាងជីវិតថ្មី រត់ចោលទឹកដី ព្រោះស្នេហ៍ស្រីពិត
ទោះនៅឯនាយ ក៏បងនៅគិត សាកសួរញាតិមិត្ត
ពីស្រីជីវា។
ពីស្រីជីវា។
២១. តើស្ងួនបានសុខ ឬស្ងួនមានទុក្ខ រាល់ទិនទិវា
ចិត្តបងពុំស្ងប់ គិតស្ងួនគ្រប់គ្រា បើស្ងួនសុខជា
បងសប្បាយក្រៃ។
បងសប្បាយក្រៃ។
២២. ឮថាស្ងួនសុខ រៀមបានស្បើយទុក្ខ ស្បើយដួងហឫទ័យ
ធូរចិត្តកង្វល់ ខ្វាយខ្វល់រាល់ថ្ងៃ ស្រីអើយៗស្រី
សុខរហូតណា!
សុខរហូតណា!
២៣. ជាតិនេះនិស្ស័យ ត្រឹមលួចស្នេហ៍ស្រី ទុកក្នុងឱរា
បានត្រឹមមើលអូន មើលស្ងួនពុំងា មើលថ្លៃជីវា
រៀបការនឹងគេ។
រៀបការនឹងគេ។
២៤. តែ!ណ្ហើយចុះ បងខំប្រឹងរស់ រស់មើលស្រីស្នេហ៍
ខំប្រឹងធ្វើការ រៀងរាល់ថ្ងៃខែ ឲ្យទ្រូងបានល្ហែ
ពីស្នេហ៍ស្រីពៅ៕
ពីស្នេហ៍ស្រីពៅ៕
Cambodian Riel Converter