Monday, February 13, 2012

បណ្ដាំម៉ែ

2012-01-28

និពន្ធដោយ យុន សុគុណ្ណា

១. នឹកស្រុកនឹកស្រែ នឹកពុកនិងម៉ែ ធ្លាប់ថែកូនស្ងួន

ពេលនេះរូបកូន បានឃ្លាតចាកខ្លួន ម៉ែលែងបានធួន
ថែកូនទៀតហើយ។

២. ទោះបីឃ្លាតឆ្ងាយ កូននឹកអ្នកម្ដាយ គ្មានពេលល្ហែល្ហើយ

បើបាននៅជិត នែបនិត្យកៀកកើយ កូននឹងបានស្បើយ
ល្ហើយពីទុក្ខា។

៣. បួនឆ្នាំកូនបែក នៅឆ្ងាយអនេក ឆ្ងាយពីមាតា

រៀននៅភ្នំពេញ ថ្នាក់បរិញ្ញា កូនខំសិក្សា
តាមបណ្ដាំម្ដាយ។

៤. ពាក្យពេចន៍ម៉ែផ្ដាំ កូននៅចងចាំ ចាំគ្មានរសាយ

ពេលខ្លះកូននឹក រលឹកអ្នកម្ដាយ ទឹកភ្នែកហូរខ្ចាយ
ព្រោះចាំពាក្យម៉ែ។

៥. ម៉ែថាកូនប្រុស ចេះដឹងត្រូវខុស ណាប្រុសមាសស្នេហ៍

មិនត្រូវប្រព្រឹត្ត ស្រាស្រីល្បែងល្បែ កូនចាំពាក្យម៉ែ
ជាក់ទុកក្នុងប្រាណ។

៦. ខំប្រឹងសិក្សា វិជ្ជាអស់អាថ៌ សាស្ត្រាជាស្ពាន

វាអាចចម្លង កូនបានសុខសាន្ត កូននឹងស្រាកស្រាន្ត
ព្រោះតែចំណេះ។

៧. វិជ្ជាជាទ្រព្យ ចាប់វាឲ្យជាប់ កុំអោយរបេះ
កូននឹងសោយផល ព្រោះតែតម្រិះ ជាយានជំនិះ
ជិះដល់អវសាន។

៨. ពេលពុកបែកទៅ ម៉ែថែកូនពៅ ដោយគ្មានស្រាកស្រាន្ត

ម៉ែធ្វើការងារ សព្វគ្រប់បែបយ៉ាង ទុកដាក់ចានក្បាន
និងការសព្វមុខ។

៩. ម៉ែមិនដែលត្អូញ ចំពោះរូបកូន ទោះបីមានទុក្ខ

ម៉ែតែងញញឹម សង្ឃឹមទៅមុខ ថានឹងផុតទុក្ខ
ព្រោះកូនទាំងបី។

១០. កូនសូមអរគុណ គុណម៉ែដែលធ្ងន់ ធ្ងន់ហួសវិស័យ
មិនអាចពណ៌នា អំពីតម្លៃ ពិសេសពេកក្រៃ

លើសអស់សាគរ។

១១. ក្នុងមួយជីវិត កូនមិនបំភ្លេច អ្នកម្ដាយបវរ
ព្រោះម៉ែមានគុណ ធ្ងន់លើសផែនថ្ម រាប់លានគីឡូ

មិនអាចគណនា។

១២. ថ្ងៃនេះកូនអរ ព្រោះមានអំណរ សរសេរពណ៌នា
ពីបណ្ដាំម្ដាយ និងគុណមហិមា ដែលម៉ែពុះពារ

ដើម្បីរូបកូន៕

ចៅចិត្តវិបល្លាស

ចៅចិត្តវិបល្លាស់

2012-01-31

ដោយ យុន សុគុណ្ណា

១.មករៀនទីក្រុង លង់ខ្លួនឲ្យផុង ភ្លើងពណ៌ឆើតឆាយ

ឈ្លក់ទឹកម៉ាស៊ីន ព្រោះតែសប្បាយ ចាយវាយខ្ជះខ្ជាយ
មិនខំសិក្សា។

២.យាយបានផ្ដែផ្ដាំ ចៅអើយចូរចាំ កុំភ្លេចឡើយណា

ត្រូវខិតខំរៀន កុំដើរហ៊ឺហា ត្រូវរកប្រាជ្ញា
ជាទ្រព្យប្រពៃ។

៣.យាយគ្មានអ្វីចែក ឲ្យច្រើនអនេក ទៅដល់ចៅថ្លៃ

មានតែវិជ្ជា ល្អពន់ពេកក្រៃ ដូច្នេះចៅយាយ
ត្រូវចាំឲ្យជាក់។

៤.បែកគ្នាពីរឆ្នាំ ចៅមិនបានចាំ បណ្ដាំប្រត្យក្ស

ដែលយាយបានផ្កាំ ចំពោះរូបអ្នក យាយស្ទើរតែធ្លាក់
ថ្លើមចេញពីកាយ។

៥.មិនគួរចៅប្រុស ប្រព្រឹត្តកំហុស ខុសឆ្គងវែងឆ្ងាយ

នៅក្នុងជាតិនេះ យាយសែននឹកស្ដាយ មិនគួរជួបកាយ
ចៅចិត្តវិបល្លាស។

៦.ចៅបានធ្វើខុស ប្រព្រឹត្តកំហុស ខុសចំពោះភក្ត្រ

ព្រោះតែថ្នាំញៀន ធ្វើឲ្យចៅធ្លាក់ ទៅក្នុងអន្ទាក់
អន្លង់លោកិយ។

៧.មានគេប្រាប់ថា ចៅគេចសាលា ជារៀងរាល់ថ្ងៃ

ម្ដេចធ្វើយ៉ាងនេះ ដូច្នេះចៅយាយ ចៅគ្មានប្រណី
ដល់យាយទេឬ?

៨.ចៅអើយយាយយំ ងទុក្ខក្រៀមក្រំ ថ្នាក់មានជំងឺ

ព្រោះចៅសម្លាញ់ ធ្វើឲ្យយាយឈឺ យាយមិនចង់លឺ
ពាក្យបែបនេះឡើយ៕

ខ្មែរសាមគ្គី

និពន្ធដោយ៖ លោក យុន សុគុណ្ណា

2012-01-31

១. ខ្មែរគឺជាពាក្យតែមួយម៉ាត់ ល្អពន់ពេកក្តាត់យ៉ាងអស្ចារ្យ

គ្រប់ជាតិទាំងអស់លើលោកា ក៏គ្មានសាសន៍ណាដូចជាខ្មែរ។

២. ខ្មែរល្អទាំងឫក និងមាយាទ ខ្មែរខំខ្មីឃ្មាតរក្សាថែ

ពូជពង្សត្រកូលកេរ្តិ៍ឈ្មោះខ្មែរ ខ្មែរនៅតែស្នេហ៍ជាតិគ្មានពីរ។

៣. ខ្មែរស្រឡាញ់ខ្មែរខ្មែរនឹងរស់ ខ្មែរមិនបាត់ឈ្មោះពីប្រថពី

ឱខ្មែរអើយខ្មែរចូរសាមគ្គី ខ្មែរមានជីវីមិនបង់បាត់។

៤. ខ្មែរអើយចូរអ្នកខំថែរថួន ជាតិខ្មែរអោយមួនកុំអោយខ្ចាត់

បើអ្នកភ្លេចខ្លួនជាតិនឹងភ្លាត់ ដូច្នេះប្រយ័ត្នគ្រប់វេលា។

៥. ខ្ញុំជាកូនខ្មែរកើតដីខ្មែរ ខ្ញុំរក្សាកេរ្តិ៍ដោយពុះពារ

ឱខ្មែរអើយខ្មែរចូរសាមគ្គា រក្សាប្រជាជាតិអោយគង់។

៦. ចូរពួតដៃគ្នារួមកំលាំង ខិតខំតតាំងហើយទ្រទ្រង់

ប្រជាជាតិយើងអោយគង់វង្ស ចូរខ្មែរស្មោះត្រង់ជាតិជានិច្ច៕

ទឹកចិត្តបងស្រី

2012-02-10

ដោយ យុន សុគុណ្ណា

(បទពាក្យប្រាំពីរ)

១. ថ្ងៃនេះមេឃាមានដួងចន្ទ មានពណ៌សុវណ្ណលើនភា
ចែងចាំងពន្លឺជះពសុធា រូបខ្ញុំកំព្រានៅម្នាក់ឯង។

២. នឹកបងស្រីថ្លៃសំណព្វចិត្ត ប្អូនដឹងថាបងគិតចំបែង
វាចាដួងចិត្តខ្ញុំសូមថ្លែង រឿងរ៉ាវជាក់ស្ដែងបងស្រីខ្ញុំ។

៣. យប់ថ្ងៃបងខំគ្មានសម្រាក ឲ្យបានស្រាន្តស្រាកទុក្ខក្រៀមក្រំ
បងប្រឹងខ្លាំងណាស់ព្រោះរូបខ្ញុំ ការងារតូចធំបងធានា។

៤. ឲ្យប្អូនប្រុសស្ងួនបានចំណេះ វិជ្ជាតម្រិះចេះគណនា
បងស្រីសុខចិត្តរងវេទនា ឲ្យប្អូនស្ងួនភ្ងាបានសិក្សា។

៥. តាំងពីថ្នាក់តូចដល់ថ្នាក់ធំ ចាប់ពីមធ្យមដល់មហា
ចប់ថ្នាក់បាក់ឌុបចូលបរិញ្ញា បងនឿយកាយាក៏ស៊ូទ្រាំ។

៦. ពេលខ្លះធ្លាក់ខ្លួនមានជំងឺ ខ្ញុំមិនដែលឮបងរទាំ
ធ្វើការក្រោមមេឃភ្លៀងជោកជាំ ក៏បងស៊ូទ្រាំបានទាំងអស់។

៧. បងមិនបន្ទោសរឿងខ្ញុំធ្វើ នូវរាល់ទង្វើខ្ញុំមានខុស
បងលើកលែងទោសឲ្យប្អូនប្រុស ទោះបីកំហុសប្អូនធ្ងន់ធ្ងរ។

៨. ពេលប្អូនមករៀននៅទីក្រុង បងស្រីឆោមយង់ស្រស់បវរ
ខិតខំតាមប្អូនទាំងត្រដរ បងស្រីស្មោះសនឹងប្អូនប្រុស។

៩. បងខំស្វែងការងារធ្វើ ឲ្យប្អូនជំទើរបានរៀនខ្ពស់
ទោះការងារខ្លះនាំអ័ព្ទយស បងស្រីឈ្មុលឈ្មុសមិនដែលត្អូញ។

១០. ដោយសារតែរូបប្អូនប្រុសមួយ បងស្ទើររលួយកាយទ្រុឌទ្រោម
បងស្រីសម្លាញ់មិនរញម ដើម្បីរូបប្អូនប្រុសជីវ៉ា។

១១. បងថានែប្អូនប្រុសសម្លាញ់ បងមិនចុះចាញ់រឿងវាសនា
ទោះបីយើងក្រក្រពះផ្សា ត្រូវខំប្រឹងណាកនិដ្ឋាបង។

១២. សុខចិត្តអត់ឃ្លានឲ្យតែពៅ ប្អូនស្រស់ឆោមឆ្លៅពៅស្នេហ៍ស្នង
ប្អូនខិតខំរៀនណានួនល្អង កុំធ្វើឲ្យបងរងទឹកភ្នែក។

១៣. បងនឹកទៅដល់រឿងបណ្ដាំ ដែលម៉ែបានផ្តាំយ៉ាងល្អឯក
រឿងមួយបងព្រួយសែនសង្វេគ ហៀបពេលម៉ែចែកចាកឋានទៅ។

១៤. មិនថាថ្ងៃយប់ព្រឺរងា បងស្រីពុះពាររងាក្ដៅ
ឲ្យប្អូនបានហូបឆ្អែតត្រឹមត្រូវ មុនពេលបងទៅធ្វើកិច្ចការ។

១៥. ថ្ងៃមួយរញ្ជួយចិត្តស្ទើរស្លុត បងស្រីកម្សត់ប្រាប់ប្អូនថា
បងជាស្រីរាំនៅក្នុងបារ ឲ្យទឹកនេត្រាខ្ញុំហូរធ្លាក់។

១៦. ម្ដេចបងស្រឡាញ់ខ្ញុំដល់ម្ល៉េះ ទ្រូងប្អូនស្ទើរប្រេះដោយអួលអាក់
មិនគួរបងយកខ្លួនជាធ្នាក់ ឲ្យប្អូនប្រុសម្នាក់បានសិក្សា។

១៧. តើដោយសារខ្ញុំមែនឬអី បានជាបងស្រីរងទុក្ខា
ដើម្បីរូបប្អូនបងធ្វើការ ជាអ្នករាំបារពេលរាត្រី។

១៨. ពេលដែលឮភ្លាមខ្ញុំរន្ធត់ ដូចត្រូវទឹកក្រុតមកប្រល័យ
ជីវិតកម្សត់គ្មាននិស្ស័យ អនិច្ចាបងស្រីរបស់ខ្ញុំ។

១៩. បងអើយទឹកភ្នែកប្អូនហូរទៅ ស្រក់លើសៀវភៅកកដុំៗ
ធ្លាប់តែសប្បាយប្រែក្រៀមក្រំ អុះឱ! អារម្មណ៍ហោះទៅណា។

២០. បងស្រីកម្សត់លើសជីវិត មិនគួរបងគិតចិត្តមេត្តា
ព្រោះតែរូបខ្ញុំបងខ្លោចផ្សា បង់រូបកាយានិងកិត្តិយស។

២១. បងស្រីតស៊ូក្នុងជីវិត ឲ្យប្អូនឆោមស្និទ្ធបានរៀនរស់
ដោយបងចង់ឲ្យប្អូនបានខ្ពស់ ទោះបីអ័ព្ទយសបងមិនថា។

២២. នេះជាទឹកចិត្តនៃបងស្រី ដើម្បីប្អូនថ្លៃឆ្នៃកាយា
រៀនសូត្រដល់ថ្នាក់បរិញ្ញា សុខចិត្តធ្វើការពេលរាត្រី។

២៣. ពពករសាត់លើវេហា សូមនាំវាចាប្រាប់បងស្រី
ថាក្នុងជាតិនេះប្អូនគ្មានអ្វី សងគុណបងស្រីសម្លាញ់ឡើយ។

២៤. អុះឱ! ទឹកភ្នែកឈប់ហូរមក ខ្ញុំមិនចង់សោករឿងឥតស្បើយ
ឱបងសម្លាញ់ចិត្តប្អូនអើយ ម្តេចឡើយមករងទុក្ខគ្រាំគ្រា។

២៥. ដល់ពេលរៀនចប់ខ្ញុំនឹងជួយ បងស្រីតែមួយត្រួយស្ងួនភ្ងា
ប្អូនមិនឲ្យបងរងវេទនា ពាក្យគេនិន្ទាដោយសារខ្ញុំ។

២៦. ប្អូននឹងខំប្រឹងកសាងឈ្មោះ រស់មានកិត្តិយសក្នុងសង្គម
នេះគឺដោយសារបងឧត្ដម បងស្រឡាញ់ខ្ញុំលើសអ្វីៗ។

២៧. ប្រសិនបើខ្ញុំមានជាតិមុខ សូមឲ្យជួបសុខនឹងបងស្រី
ជួបគ្នាជាបងប្អូនរួមផ្ទៃ គ្រប់ជាតិកុំបីឃ្លៀងឃ្លាតឡើយ។

២៨. សូមព្រះឃុំគ្រងថែរក្សា បងស្រីជីវាឲ្យបានស្បើយ
ឲ្យខ្ញុំនិងគាត់ជួបកោះត្រើយ សូមបានល្ហែល្ហើយកុំបីហ្មង៕

គុណព្រះម៉ែ

2012-02-08

ដោយ គង់ ឡាយ, នូវែលហ្សេឡង់ (Auckland, New Zealand)

(បទព្រហ្មគីតិ)

១. កូនអើយចូរចងចាំ បាបានផ្តាំចារទុកឱ្យ
ម៉ែឪចាស់ណាស់ហើយ គ្មានអ្វីឡើយទុកជាកេរ។

២· មានតែពាក្យសម្ដី គុណម៉ែថ្លៃណាស់មាសមេ
ពាក្យចាស់ពីបុព្វេ គ្មានអ្វីស្មើគុណម៉ែថ្លៃ។

៣. កាលកូនចាប់កំណើត បានមកកើតឋិតក្នុងផ្ទៃ
ប្រាំបួនខែដប់ថ្ងៃ កូនចាកផ្ទៃម៉ែខ្លោចផ្សា។

៤. ឆ្លងផុតមហាសមុទ្រ ស្ទើររលត់សូន្យសង្ខារ
ទម្រាំឃើញជីវា លើកហត្ថាម៉ែរសាយ។

៥. កាលកូននៅពីតូច ម៉ែពរងូតសំអាតកាយ
អាចម៍នោមមិនជិនណាយ ម៉ែដុសលាងតែនឹងដៃ។

៦. កូនឈឺម៉ែភ័យខ្លាច ម៉ែឱហាតទាំងយប់ថ្ងៃ
ថែទាំគ្មានសំចៃ នោះគឺន័យព្រោះតែបុត្រ។

៧. និស្ស័យម្ដាយនិងកូន សាងជាក្បូនលើសមុទ្រ
ឆ្លងកាត់គ្រាកម្សត់ ម៉ែតស៊ូទ្រាំបាននៅ។

៨. ថែកូនឱ្យដឹងក្ដី កូនប្រុសស្រីចងចាំនូវ
បណ្ដាំពាក្យម៉ែឪ ចងចាំទៅណាកូនណា។

៩. សងគុណបានមិនបាន មិនប៉ុន្មានទេពៅណា
ធ្វើឱ្យចិត្តមេបា សប្បាយទៅនោះបានហើយ។

១០. គុណម៉ែធ្ងន់ពេកពន់ គ្មានអ្វីធ្ងន់ប្រៀបបានឡើយ
ដូចនេះកុំកន្តើយ សងគុណទៅទាន់ព្រះរស់។

១១. ចាំដល់គាត់ចាកឋាន បុណ្យប៉ុន្មានមិនឃើញដល់
ដៃគាត់ឬមិនដល់ នៅស្ថានណាយើងមិនដឹង។

១២. បើកូនកតញ្ញូ នោះមិនយូរកូននឹងដឹង
ចៅៗវានឹងប្រឹង សងកូនវិញជាមិនខាន។

១៣. ព្រះពុទ្ធទ្រង់សម្ដែង កូនស្វះស្វែងមុខជាបាន
យល់ដល់ក្ដីសន្តាន នៃចិត្តម្ដាយដ៏បរិសុទ្ធ។

១៤. ទឹកភ្នែកម៉ែឪហូរ ប្រៀបជន់ជោរនៃសមុទ្រ
កូនហែលមិនប្រាកដ ចាកផុតទុក្ខនៃជីវិត។

១៥. ចិញ្ចឹមកូនមិនរាប់ថ្ងៃ គ្មានកម្រៃក៏មិនគិត
នឿយហត់ទុកក្នុងចិត្ត មិនដែលថ្ងូរឱ្យកូនដឹង។

១៦. ដល់កូនធំដឹងក្ដី ចង់បានអ្វីម៉ែខំប្រឹង
ផ្ដល់ឱ្យមិនទាំងខឹង គាប់ចិត្តកូនមាននឹងគេ។

១៧. ដល់កូនមានគ្រួសារ ពុំប្រាថ្នាអ្វីនោះទេ
ចង់ឱ្យកូនទាំងទ្វេ បានសុខសាន្តនោះបានហើយ។

១៨. បើកូនចង់សាងបុណ្យ ម៉ែឪមុនគេនេះហើយ
ចូរកូនកុំភ្លេចឡើយ មុនទៅធ្វើបុណ្យឯវត្ត៕

ដួងចិត្តសម្ងាត់

ដួងចិត្តសំងាត់

2012-02-07

ដោយ មៀច នាង សហរដ្ឋអាមេរិក

(បទកាកគតិ)

១. ពេលខ្ញុំឃើញស្រី វង់ភក្ត្រប្រិមប្រិយ ដូចដួងព្រះចន្ទ្រ

ស្រីខ្មែរបវរ ចិត្តខ្ញុំជាប់មន្ត ស្នេហ៍ស្រីតូចតន់
ដកចិត្តពុំបាន។

២. មិនហ៊ានវាចា ទៅកាន់ជីវា ថារៀមស្ម័គ្រប្រាណ

រួមរស់នឹងស្ងួន លុះដល់អវសាន ទោះរៀមក្ស័យប្រាណ
ក៏មិនរុញរា។

៣. ហាស្ដីមិនរួច បានត្រឹមតែលួច មើលស្ងួនពុំងា

តើកម្មអ្វីខ្ញុំ ដូចមានវេរា ពេលជួបពុំងា
បាត់អស់ស្មារតី។

៤. កែវភ្នែកមុតថ្លា សម្លឹងកាលណា រាមញ័រហរទ័យ

ទ្រូងញ័រស្ទើរធ្លាយ ធ្លាយធ្លាក់ដល់ដី ស្រីមានមន្តអ្វី
ម្ចាស់ស្រីសំឡាញ់?

៥. ទប់ចិត្តមិនបាន ញ័រអស់អង្គប្រាណ អង្គប្រាណបានចាញ់

សម្រស់ស្រីល្អ ថ្លែងសបង់បាញ់ បងជាប់សំណាញ់
ស្នេហ៍ស្រីល្អឯក។

៦. ឱអង្គខ្ញុំអើយ តើពេលណាឡើយ ទើបកម្មឈប់ជ្រែក

ឲ្យចេញវាចា រកស្រីល្អឯក ថាខ្ញុំពន់រែក
ស្នេហ៍ស្រីម្នាក់ឯង។

៧. នាងមិនដឹងខ្លួន ខ្ញុំទុក្ខរឹតផ្ទួន ស្ទើរឆ្កួតវង្វេង

សញ្ជឹងក្នុងចិត្ត ថាឱស្រីក្មេង តើជាគូព្រេង
ឬក៏យ៉ាងណា?

៨. បែរបន់បួងសួង លើកហត្ថសំរួម ឥន្ទ្រព្រហ្មទេវតា

ពន្យល់ចិត្តស្រី ថាខ្ញុំស្នេហា តែកែវកនិដ្ឋា
ស្នេហាបងអើយ។

៩. ហាក់គ្មានបានអ្វី ព្រោះតែស្រស់ស្រី នៅធ្វើព្រងើយ

ស្ងួនមិនបានដឹង ព្រលឹងបងអើយ ទុក្ខបងគ្មានស្បើយ
ល្ហែល្ហើយថ្ងៃណា។

១០. លួចស្នេហ៍លាក់ទុក គរក្នុងជង្រុក ជង្រុកស្នេហា

ពាក្យស្នេហ៍មួយម៉ាត់ មិនហ៊ានវាចា ទៅរកជីវា
ឲ្យស្រីបានយល់។

១១. បានត្រឹមសម្លឹង រួចគិតសញ្ជឹង ឲ្យទ្រូងខ្វាយខ្វល់

តើពេលណាទៅ ទើបពៅនិមល បានដឹងនឹងយល់
យល់ចិត្តរាមរ៉ា។

១២. ខែមួយផុតទៅ ឆ្លងដល់រដូវ ប្រាំងចូលវស្សា

ផុតទៅដល់ឆ្នាំ ទ្រូងកម្មខ្លោចផ្សា លាក់ចិត្តវាចា
ដួងចិត្តសំងាត់។

១៣. ចូលដល់ឆ្នាំបី សម្រេចចិត្តថ្មី ថាចិត្តត្រូវកាត់

និយាយនឹងស្រី ពីស្នេហ៍សំងាត់ ទោះបីស្រីបាត់
ស្រីបានទៅគេ។

១៤. ពេលនេះបានយល់ ដឹងថានិមល ព្រមដាក់ទានស្នេហ៍

ខ្ញុំបានស្បើយចិត្ត រឹតពីបុព្វេ លកលៃរិះរេ
និយាយនឹងម្ដាយ។

១៥. ម៉ែពោលពាក្យថា ប្រុសស្ងួនពុំងា បុត្រថ្លៃឆោមឆាយ

កូនគេមន្ត្រី ឋានៈហួសឆ្ងាយ តើអ្នកឲ្យម្ដាយ
ធ្វើអ្វីនឹងបាន?

១៦. គេមានស័ក្ដិយស ត្រកូលគេខ្ពស់ ណាប្រុសកល្យាណ

ឯគ្រួសារយើង ទ្រព្យធនក៏គ្មាន ធ្វើម្ដេចម្ដាយហ៊ាន
តភ្ជាប់និស្ស័យ?

១៧. ខ្ញុំមានចំណេះ សូមម៉ែត្រិះរិះ គិតសាជាថ្មី

ក្រែងប៉ានាងព្រម ទុកដាក់កូនស្រី ក្រែងភ័ព្វនិស្ស័យ
ឱណាម៉ែណា!

១៨. ទ្រូងខ្ញុំប្រេះធ្លាយ ដោយដឹងឆោមឆាយ រង់ថ្ងៃរៀបការ

នឹងគេមន្ត្រី ក្នុងទូតរាជការ សែនស្ដាយជីវា
ស្ដាយពេញមួយជាតិ។

១៩. រឿងខ្ញុំរឿងពិត ញាតិអើយជួយគិត ខ្ញុំធ្វើអ្វីទៀត

ចិត្តស្នេហ៍ស្ងួនមួយ ស្នេហ៍ពេញមួយជាតិ ឥឡូវត្រូវឃ្លាត
ឃ្លាតមួយជីវិត។

២០. សាងជីវិតថ្មី រត់ចោលទឹកដី ព្រោះស្នេហ៍ស្រីពិត

ទោះនៅឯនាយ ក៏បងនៅគិត សាកសួរញាតិមិត្ត
ពីស្រីជីវា។

២១. តើស្ងួនបានសុខ ឬស្ងួនមានទុក្ខ រាល់ទិនទិវា

ចិត្តបងពុំស្ងប់ គិតស្ងួនគ្រប់គ្រា បើស្ងួនសុខជា
បងសប្បាយក្រៃ។

២២. ឮថាស្ងួនសុខ រៀមបានស្បើយទុក្ខ ស្បើយដួងហឫទ័យ

ធូរចិត្តកង្វល់ ខ្វាយខ្វល់រាល់ថ្ងៃ ស្រីអើយៗស្រី
សុខរហូតណា!

២៣. ជាតិនេះនិស្ស័យ ត្រឹមលួចស្នេហ៍ស្រី ទុកក្នុងឱរា

បានត្រឹមមើលអូន មើលស្ងួនពុំងា មើលថ្លៃជីវា
រៀបការនឹងគេ។

២៤. តែ!ណ្ហើយចុះ បងខំប្រឹងរស់ រស់មើលស្រីស្នេហ៍

ខំប្រឹងធ្វើការ រៀងរាល់ថ្ងៃខែ ឲ្យទ្រូងបានល្ហែ
ពីស្នេហ៍ស្រីពៅ៕

Flash Clock

LikeBox

ទាញយកយូនីកូដខ្មែរៈ

ចំណាត់ថ្នាក់តាមក្រុម

movies

កំណាព្យ

Followers

ម៉ោងនៅកម្ពុជា

Weather

Blogger news

Clock Style

Monday, February 13, 2012

បណ្ដាំ​ម៉ែ

2012-01-28

ចៅ​ចិត្ត​វិបល្លាស់

2012-01-31

ខ្មែរសាមគ្គី

និពន្ធ​ដោយ៖ លោក យុន សុគុណ្ណា

2012-01-31

ទឹក​ចិត្ត​បង​ស្រី

2012-02-10

គុណ​ព្រះ​ម៉ែ

2012-02-08

ដួងចិត្ត​សំងាត់

2012-02-07

Ramayana - The Epic

Social Profiles

អត្ថបទពេញនិយមបំផុត

Music Player

អត្រាប្តូរប្រាក់នៅកម្ពុជា

ប្រតិទិន

Labels

Blog Archive

Live Traffic Feeds

Total Vistors

Website IT

Content left

គេហទំព័រកំសាន្ត

គេហទំព័រព្រះធម៌ និងសុខភាព

News​ and Job Website

បណ្ដាំម៉ែ

ចៅចិត្តវិបល្លាស់

និពន្ធដោយ៖ លោក យុន សុគុណ្ណា

ទឹកចិត្តបងស្រី

គុណព្រះម៉ែ

ដួងចិត្តសំងាត់

News and Job Website