កំណាព្យ

ពូជ គឺ គំនិត

ពូជ គឺ គំនិត និងចំណេះ	វិជ្ជាវិសេសល្បីអស្ចារ្យ
កសាងប្រាង្គប្រាសាទសិលា	វប្បធម៌ថ្លៃថ្លា...ចរិយាខ្មែរ។
កូនចៅជាន់ក្រោយកុំព្រងើយ	របស់មានហើយត្រូវជួយថែ
ចេះកសាងខ្លួនខ្លាំងពូកែ	កុំឲ្យចាញ់គេជាតិដទៃ។
អ្វីដែលនៅខ្វះមិនទាន់មាន	ត្រូវតែខំរៀនគិតលកលៃ
ធ្វើឲ្យកើតឡើងទើបផុតភ័យ	ពឹងជាតិដទៃមិនស្រួលទេ។
អ្វីដែលមិនល្អឬមិនសម	ត្រូវតែកែផ្សំខំងាករេ
កែច្នៃឲ្យល្អមាំស្ថិតស្ថេរ	ពេញនិយមគេត្រូវការវិញ។
អ្វីដែលអាក្រក់ខូចប្រយោជន៍	នាំឲ្យហិនហោចគ្មានចំណេញ
ត្រូវតែលះបង់វាចោលចេញ	ស្វែងរកថ្មីវិញកុំអាល័យ។
យើងកសាងជាតិត្រូវសាមគ្គី	រួបរួមមូលមីរថែតម្លៃ
វប្បធម៌ជាតិយើងឲ្យថ្លាថ្លៃ	នឹងនាំគ្នាច្នៃលូតខ្ពស់ឡើង។
កុំឈ្លោះទាស់ទែងបាក់បែកគ្នា	ជាតិកម្ពុជាយើងមិនថ្កើង
មេត្តាករុណាគ្នាច្រើនឡើង	ទើបជាតិយើងថ្កើងឡើងវិញបាន។
បងប្អូនខ្មែរអើយភ្ញាក់រលឹក	គគ្រេងគគ្រឹកកុំបីខាន
កសាងការពារជាតិឲ្យបាន	កម្ពុជាក្សេមក្សាន្តអង្វែងទៅ៕
ភិក្ខុ ងិន ភេន

ស្រឡាញ់ពូជខ្មែរ

កំណាព្យ

ស្រឡាញ់ជាតិខ្មែរ

ស្រឡាញ់ពូជខ្មែរត្រូវថែរក្សា	កេរពីដូនតាទុកឲ្យគង់វង្ស
ដែលលោកខំសាងដោយក្តីផ្ចិតផ្ចង់	មិនឲ្យបាត់បង់ត្រង់ណាមួយសោះ។
ស្រឡាញ់ពូជខ្មែរត្រូវថែរក្សា	អ្នកមានប្រាជា្ញចេះដឹងឥតខ្ចោះ
គេបានសិក្សាសព្វសិល្ប៍ទាំងអស់	លោកអ្នកប្រាជ្ញនោះជួយសាងជាតិយើង។
ស្រឡាញ់ពូជខ្មែរត្រូវថែរក្សា	នគរវត្តវ៉ាឲ្យចម្រើនឡើង
ទៅទន្ទឹមគ្នាទាំងពីររុងរឿង	ប៉ុន្តែពួកយើងទុកជាតិជាធំ។
ស្រឡាញ់ពូជខ្មែរត្រូវថែរក្សា	ធម៌៤ប្រការលោកហៅថាព្រហ្ម
ទោះបីអ្នកតូចឬមួយអ្នកធំ	ត្រូវមានធម៌ព្រហ្មវិហារធំបំផុត។
ស្រឡាញ់ពូជខ្មែរត្រូវថែរក្សា	អប់រំបញ្ញាចិត្តថ្លាបរិសុទ្ធ
ដឹងខុសដឹងត្រូវបញ្ញាភ្លឺមុត	អាចនាំឆ្លងផុតក្តីទុក្ខក្តួលក្តៅ។
ស្រឡាញ់ពូជខ្មែរត្រូវថែរក្សា	ទម្លាប់ដូនតាបំបួសកូនចៅ
អប់រំឲ្យឆ្អិនកុំឲ្យនៅឆៅ	ពេលប្រើការទៅបានផលប្រចក្ស។
ស្រឡាញ់ពូជខ្មែរត្រូវថែរក្សា	និយមអាហារសម្លៀកបំពាក់
និងប្រពៃណីថ្លៃថ្លាអនគ្ឃ	ខ្មែរត្រូវរួមរក្សាទុកឲ្យល្អ។
ស្រឡាញ់ពូជខ្មែរត្រូវថែរក្សា	រួមជាតិខេមរាឲ្យមូលកុះករ
នាំគ្នាសាងជាតិឲ្យថ្កើងបវរ	ល្បីដូចអង្គរខ្ចាយខ្ចរគ្រប់ទិស៕