ទឹកចិត្តបងស្រី
2012-02-10
ដោយ យុន សុគុណ្ណា
(បទពាក្យប្រាំពីរ)
១. ថ្ងៃនេះមេឃាមានដួងចន្ទ មានពណ៌សុវណ្ណលើនភា
ចែងចាំងពន្លឺជះពសុធា រូបខ្ញុំកំព្រានៅម្នាក់ឯង។
ចែងចាំងពន្លឺជះពសុធា រូបខ្ញុំកំព្រានៅម្នាក់ឯង។
២. នឹកបងស្រីថ្លៃសំណព្វចិត្ត ប្អូនដឹងថាបងគិតចំបែង
វាចាដួងចិត្តខ្ញុំសូមថ្លែង រឿងរ៉ាវជាក់ស្ដែងបងស្រីខ្ញុំ។
វាចាដួងចិត្តខ្ញុំសូមថ្លែង រឿងរ៉ាវជាក់ស្ដែងបងស្រីខ្ញុំ។
៣. យប់ថ្ងៃបងខំគ្មានសម្រាក ឲ្យបានស្រាន្តស្រាកទុក្ខក្រៀមក្រំ
បងប្រឹងខ្លាំងណាស់ព្រោះរូបខ្ញុំ ការងារតូចធំបងធានា។
បងប្រឹងខ្លាំងណាស់ព្រោះរូបខ្ញុំ ការងារតូចធំបងធានា។
៤. ឲ្យប្អូនប្រុសស្ងួនបានចំណេះ វិជ្ជាតម្រិះចេះគណនា
បងស្រីសុខចិត្តរងវេទនា ឲ្យប្អូនស្ងួនភ្ងាបានសិក្សា។
បងស្រីសុខចិត្តរងវេទនា ឲ្យប្អូនស្ងួនភ្ងាបានសិក្សា។
៥. តាំងពីថ្នាក់តូចដល់ថ្នាក់ធំ ចាប់ពីមធ្យមដល់មហា
ចប់ថ្នាក់បាក់ឌុបចូលបរិញ្ញា បងនឿយកាយាក៏ស៊ូទ្រាំ។
ចប់ថ្នាក់បាក់ឌុបចូលបរិញ្ញា បងនឿយកាយាក៏ស៊ូទ្រាំ។
៦. ពេលខ្លះធ្លាក់ខ្លួនមានជំងឺ ខ្ញុំមិនដែលឮបងរទាំ
ធ្វើការក្រោមមេឃភ្លៀងជោកជាំ ក៏បងស៊ូទ្រាំបានទាំងអស់។
ធ្វើការក្រោមមេឃភ្លៀងជោកជាំ ក៏បងស៊ូទ្រាំបានទាំងអស់។
៧. បងមិនបន្ទោសរឿងខ្ញុំធ្វើ នូវរាល់ទង្វើខ្ញុំមានខុស
បងលើកលែងទោសឲ្យប្អូនប្រុស ទោះបីកំហុសប្អូនធ្ងន់ធ្ងរ។
បងលើកលែងទោសឲ្យប្អូនប្រុស ទោះបីកំហុសប្អូនធ្ងន់ធ្ងរ។
៨. ពេលប្អូនមករៀននៅទីក្រុង បងស្រីឆោមយង់ស្រស់បវរ
ខិតខំតាមប្អូនទាំងត្រដរ បងស្រីស្មោះសនឹងប្អូនប្រុស។
ខិតខំតាមប្អូនទាំងត្រដរ បងស្រីស្មោះសនឹងប្អូនប្រុស។
៩. បងខំស្វែងការងារធ្វើ ឲ្យប្អូនជំទើរបានរៀនខ្ពស់
ទោះការងារខ្លះនាំអ័ព្ទយស បងស្រីឈ្មុលឈ្មុសមិនដែលត្អូញ។
ទោះការងារខ្លះនាំអ័ព្ទយស បងស្រីឈ្មុលឈ្មុសមិនដែលត្អូញ។
១០. ដោយសារតែរូបប្អូនប្រុសមួយ បងស្ទើររលួយកាយទ្រុឌទ្រោម
បងស្រីសម្លាញ់មិនរញម ដើម្បីរូបប្អូនប្រុសជីវ៉ា។
បងស្រីសម្លាញ់មិនរញម ដើម្បីរូបប្អូនប្រុសជីវ៉ា។
១១. បងថានែប្អូនប្រុសសម្លាញ់ បងមិនចុះចាញ់រឿងវាសនា
ទោះបីយើងក្រក្រពះផ្សា ត្រូវខំប្រឹងណាកនិដ្ឋាបង។
ទោះបីយើងក្រក្រពះផ្សា ត្រូវខំប្រឹងណាកនិដ្ឋាបង។
១២. សុខចិត្តអត់ឃ្លានឲ្យតែពៅ ប្អូនស្រស់ឆោមឆ្លៅពៅស្នេហ៍ស្នង
ប្អូនខិតខំរៀនណានួនល្អង កុំធ្វើឲ្យបងរងទឹកភ្នែក។
ប្អូនខិតខំរៀនណានួនល្អង កុំធ្វើឲ្យបងរងទឹកភ្នែក។
១៣. បងនឹកទៅដល់រឿងបណ្ដាំ ដែលម៉ែបានផ្តាំយ៉ាងល្អឯក
រឿងមួយបងព្រួយសែនសង្វេគ ហៀបពេលម៉ែចែកចាកឋានទៅ។
រឿងមួយបងព្រួយសែនសង្វេគ ហៀបពេលម៉ែចែកចាកឋានទៅ។
១៤. មិនថាថ្ងៃយប់ព្រឺរងា បងស្រីពុះពាររងាក្ដៅ
ឲ្យប្អូនបានហូបឆ្អែតត្រឹមត្រូវ មុនពេលបងទៅធ្វើកិច្ចការ។
ឲ្យប្អូនបានហូបឆ្អែតត្រឹមត្រូវ មុនពេលបងទៅធ្វើកិច្ចការ។
១៥. ថ្ងៃមួយរញ្ជួយចិត្តស្ទើរស្លុត បងស្រីកម្សត់ប្រាប់ប្អូនថា
បងជាស្រីរាំនៅក្នុងបារ ឲ្យទឹកនេត្រាខ្ញុំហូរធ្លាក់។
បងជាស្រីរាំនៅក្នុងបារ ឲ្យទឹកនេត្រាខ្ញុំហូរធ្លាក់។
១៦. ម្ដេចបងស្រឡាញ់ខ្ញុំដល់ម្ល៉េះ ទ្រូងប្អូនស្ទើរប្រេះដោយអួលអាក់
មិនគួរបងយកខ្លួនជាធ្នាក់ ឲ្យប្អូនប្រុសម្នាក់បានសិក្សា។
មិនគួរបងយកខ្លួនជាធ្នាក់ ឲ្យប្អូនប្រុសម្នាក់បានសិក្សា។
១៧. តើដោយសារខ្ញុំមែនឬអី បានជាបងស្រីរងទុក្ខា
ដើម្បីរូបប្អូនបងធ្វើការ ជាអ្នករាំបារពេលរាត្រី។
ដើម្បីរូបប្អូនបងធ្វើការ ជាអ្នករាំបារពេលរាត្រី។
១៨. ពេលដែលឮភ្លាមខ្ញុំរន្ធត់ ដូចត្រូវទឹកក្រុតមកប្រល័យ
ជីវិតកម្សត់គ្មាននិស្ស័យ អនិច្ចាបងស្រីរបស់ខ្ញុំ។
ជីវិតកម្សត់គ្មាននិស្ស័យ អនិច្ចាបងស្រីរបស់ខ្ញុំ។
១៩. បងអើយទឹកភ្នែកប្អូនហូរទៅ ស្រក់លើសៀវភៅកកដុំៗ
ធ្លាប់តែសប្បាយប្រែក្រៀមក្រំ អុះឱ! អារម្មណ៍ហោះទៅណា។
ធ្លាប់តែសប្បាយប្រែក្រៀមក្រំ អុះឱ! អារម្មណ៍ហោះទៅណា។
២០. បងស្រីកម្សត់លើសជីវិត មិនគួរបងគិតចិត្តមេត្តា
ព្រោះតែរូបខ្ញុំបងខ្លោចផ្សា បង់រូបកាយានិងកិត្តិយស។
ព្រោះតែរូបខ្ញុំបងខ្លោចផ្សា បង់រូបកាយានិងកិត្តិយស។
២១. បងស្រីតស៊ូក្នុងជីវិត ឲ្យប្អូនឆោមស្និទ្ធបានរៀនរស់
ដោយបងចង់ឲ្យប្អូនបានខ្ពស់ ទោះបីអ័ព្ទយសបងមិនថា។
ដោយបងចង់ឲ្យប្អូនបានខ្ពស់ ទោះបីអ័ព្ទយសបងមិនថា។
២២. នេះជាទឹកចិត្តនៃបងស្រី ដើម្បីប្អូនថ្លៃឆ្នៃកាយា
រៀនសូត្រដល់ថ្នាក់បរិញ្ញា សុខចិត្តធ្វើការពេលរាត្រី។
រៀនសូត្រដល់ថ្នាក់បរិញ្ញា សុខចិត្តធ្វើការពេលរាត្រី។
២៣. ពពករសាត់លើវេហា សូមនាំវាចាប្រាប់បងស្រី
ថាក្នុងជាតិនេះប្អូនគ្មានអ្វី សងគុណបងស្រីសម្លាញ់ឡើយ។
ថាក្នុងជាតិនេះប្អូនគ្មានអ្វី សងគុណបងស្រីសម្លាញ់ឡើយ។
២៤. អុះឱ! ទឹកភ្នែកឈប់ហូរមក ខ្ញុំមិនចង់សោករឿងឥតស្បើយ
ឱបងសម្លាញ់ចិត្តប្អូនអើយ ម្តេចឡើយមករងទុក្ខគ្រាំគ្រា។
ឱបងសម្លាញ់ចិត្តប្អូនអើយ ម្តេចឡើយមករងទុក្ខគ្រាំគ្រា។
២៥. ដល់ពេលរៀនចប់ខ្ញុំនឹងជួយ បងស្រីតែមួយត្រួយស្ងួនភ្ងា
ប្អូនមិនឲ្យបងរងវេទនា ពាក្យគេនិន្ទាដោយសារខ្ញុំ។
ប្អូនមិនឲ្យបងរងវេទនា ពាក្យគេនិន្ទាដោយសារខ្ញុំ។
២៦. ប្អូននឹងខំប្រឹងកសាងឈ្មោះ រស់មានកិត្តិយសក្នុងសង្គម
នេះគឺដោយសារបងឧត្ដម បងស្រឡាញ់ខ្ញុំលើសអ្វីៗ។
នេះគឺដោយសារបងឧត្ដម បងស្រឡាញ់ខ្ញុំលើសអ្វីៗ។
២៧. ប្រសិនបើខ្ញុំមានជាតិមុខ សូមឲ្យជួបសុខនឹងបងស្រី
ជួបគ្នាជាបងប្អូនរួមផ្ទៃ គ្រប់ជាតិកុំបីឃ្លៀងឃ្លាតឡើយ។
ជួបគ្នាជាបងប្អូនរួមផ្ទៃ គ្រប់ជាតិកុំបីឃ្លៀងឃ្លាតឡើយ។
២៨. សូមព្រះឃុំគ្រងថែរក្សា បងស្រីជីវាឲ្យបានស្បើយ
ឲ្យខ្ញុំនិងគាត់ជួបកោះត្រើយ សូមបានល្ហែល្ហើយកុំបីហ្មង៕
ឲ្យខ្ញុំនិងគាត់ជួបកោះត្រើយ សូមបានល្ហែល្ហើយកុំបីហ្មង៕
Cambodian Riel Converter