គុណព្រះម៉ែ
2012-02-08
ដោយ គង់ ឡាយ, នូវែលហ្សេឡង់ (Auckland, New Zealand)
(បទព្រហ្មគីតិ)
១. កូនអើយចូរចងចាំ បាបានផ្តាំចារទុកឱ្យ
ម៉ែឪចាស់ណាស់ហើយ គ្មានអ្វីឡើយទុកជាកេរ។
ម៉ែឪចាស់ណាស់ហើយ គ្មានអ្វីឡើយទុកជាកេរ។
២· មានតែពាក្យសម្ដី គុណម៉ែថ្លៃណាស់មាសមេ
ពាក្យចាស់ពីបុព្វេ គ្មានអ្វីស្មើគុណម៉ែថ្លៃ។
ពាក្យចាស់ពីបុព្វេ គ្មានអ្វីស្មើគុណម៉ែថ្លៃ។
៣. កាលកូនចាប់កំណើត បានមកកើតឋិតក្នុងផ្ទៃ
ប្រាំបួនខែដប់ថ្ងៃ កូនចាកផ្ទៃម៉ែខ្លោចផ្សា។
ប្រាំបួនខែដប់ថ្ងៃ កូនចាកផ្ទៃម៉ែខ្លោចផ្សា។
៤. ឆ្លងផុតមហាសមុទ្រ ស្ទើររលត់សូន្យសង្ខារ
ទម្រាំឃើញជីវា លើកហត្ថាម៉ែរសាយ។
ទម្រាំឃើញជីវា លើកហត្ថាម៉ែរសាយ។
៥. កាលកូននៅពីតូច ម៉ែពរងូតសំអាតកាយ
អាចម៍នោមមិនជិនណាយ ម៉ែដុសលាងតែនឹងដៃ។
អាចម៍នោមមិនជិនណាយ ម៉ែដុសលាងតែនឹងដៃ។
៦. កូនឈឺម៉ែភ័យខ្លាច ម៉ែឱហាតទាំងយប់ថ្ងៃ
ថែទាំគ្មានសំចៃ នោះគឺន័យព្រោះតែបុត្រ។
ថែទាំគ្មានសំចៃ នោះគឺន័យព្រោះតែបុត្រ។
៧. និស្ស័យម្ដាយនិងកូន សាងជាក្បូនលើសមុទ្រ
ឆ្លងកាត់គ្រាកម្សត់ ម៉ែតស៊ូទ្រាំបាននៅ។
ឆ្លងកាត់គ្រាកម្សត់ ម៉ែតស៊ូទ្រាំបាននៅ។
៨. ថែកូនឱ្យដឹងក្ដី កូនប្រុសស្រីចងចាំនូវ
បណ្ដាំពាក្យម៉ែឪ ចងចាំទៅណាកូនណា។
បណ្ដាំពាក្យម៉ែឪ ចងចាំទៅណាកូនណា។
៩. សងគុណបានមិនបាន មិនប៉ុន្មានទេពៅណា
ធ្វើឱ្យចិត្តមេបា សប្បាយទៅនោះបានហើយ។
ធ្វើឱ្យចិត្តមេបា សប្បាយទៅនោះបានហើយ។
១០. គុណម៉ែធ្ងន់ពេកពន់ គ្មានអ្វីធ្ងន់ប្រៀបបានឡើយ
ដូចនេះកុំកន្តើយ សងគុណទៅទាន់ព្រះរស់។
ដូចនេះកុំកន្តើយ សងគុណទៅទាន់ព្រះរស់។
១១. ចាំដល់គាត់ចាកឋាន បុណ្យប៉ុន្មានមិនឃើញដល់
ដៃគាត់ឬមិនដល់ នៅស្ថានណាយើងមិនដឹង។
ដៃគាត់ឬមិនដល់ នៅស្ថានណាយើងមិនដឹង។
១២. បើកូនកតញ្ញូ នោះមិនយូរកូននឹងដឹង
ចៅៗវានឹងប្រឹង សងកូនវិញជាមិនខាន។
ចៅៗវានឹងប្រឹង សងកូនវិញជាមិនខាន។
១៣. ព្រះពុទ្ធទ្រង់សម្ដែង កូនស្វះស្វែងមុខជាបាន
យល់ដល់ក្ដីសន្តាន នៃចិត្តម្ដាយដ៏បរិសុទ្ធ។
យល់ដល់ក្ដីសន្តាន នៃចិត្តម្ដាយដ៏បរិសុទ្ធ។
១៤. ទឹកភ្នែកម៉ែឪហូរ ប្រៀបជន់ជោរនៃសមុទ្រ
កូនហែលមិនប្រាកដ ចាកផុតទុក្ខនៃជីវិត។
កូនហែលមិនប្រាកដ ចាកផុតទុក្ខនៃជីវិត។
១៥. ចិញ្ចឹមកូនមិនរាប់ថ្ងៃ គ្មានកម្រៃក៏មិនគិត
នឿយហត់ទុកក្នុងចិត្ត មិនដែលថ្ងូរឱ្យកូនដឹង។
នឿយហត់ទុកក្នុងចិត្ត មិនដែលថ្ងូរឱ្យកូនដឹង។
១៦. ដល់កូនធំដឹងក្ដី ចង់បានអ្វីម៉ែខំប្រឹង
ផ្ដល់ឱ្យមិនទាំងខឹង គាប់ចិត្តកូនមាននឹងគេ។
ផ្ដល់ឱ្យមិនទាំងខឹង គាប់ចិត្តកូនមាននឹងគេ។
១៧. ដល់កូនមានគ្រួសារ ពុំប្រាថ្នាអ្វីនោះទេ
ចង់ឱ្យកូនទាំងទ្វេ បានសុខសាន្តនោះបានហើយ។
ចង់ឱ្យកូនទាំងទ្វេ បានសុខសាន្តនោះបានហើយ។
១៨. បើកូនចង់សាងបុណ្យ ម៉ែឪមុនគេនេះហើយ
ចូរកូនកុំភ្លេចឡើយ មុនទៅធ្វើបុណ្យឯវត្ត៕
ចូរកូនកុំភ្លេចឡើយ មុនទៅធ្វើបុណ្យឯវត្ត៕
Cambodian Riel Converter
No comments:
Post a Comment